Al reste inagjibil il condomini Ater di vie Brumatti a Çarvignan, indulà che vie pe gnot tra i 13 e i 14 di Dicembar dal an passât al jere stât impiât un fûc intun motorin parcât di fûr inte aree comun (par chest fat al è indagât e si cjate ai arescj domiciliârs un om di 29 agns). Di li lis flamis a vevin tacât prime altris mieç e il fum fit al veve jemplât ancje lis scjalis tant di blocâ dentri tai apartaments i residents fintremai cuant che no son rivâts i pompîrs. L’imobil al jere stât declarât inagjibil e al veve costret 70 di lôr a lâ vie.
Chest Nadâl a àn ducj un cuviert sul cjâf par fortune parcè che ducj si cjatin in abitazions gnovis, come che al vise il sindic Andrea Balducci, che al à sotlineât il fat che Comun, Regjon e Ater Udine a àn rivât une vore di corse a cjatâ une soluzion par dâ une cjase aes fameis.
“L’imobil di vie Brumatti al è ancjemò inagjibil – al vise Balducci -. I bêçs che a coventin par meti a puest dut a son cetancj. Cundut che no son problemis di staticitât, si scuen finanziâ un intervent pardabon impuartant”. La spese e podarès lâ parsore dai doi milions di euros. (a.d.g.) – 15.12.2025
