Cul vêl integrâl a scuele a Monfalcon, e sclope la polemiche

da Alessandro Di Giusto

E je polemiche sul fat che intun istitût superiôr di Monfalcon, il “Sandro Pertini”, cinc studentessis di religjon islamiche a vistissin il niqab, il vistît che al tapone dal dut la femine e al lasse libars dome i voi. Il fat al è stât publicât vuê sul Messaggero Veneto e su Il Piccolo.

De bande de scuele, come dit de dirigjente Carmela Pirano, al è stât considerât che al coventi creâ un rapuart di fidance cui arlêfs e lis lôr fameis, par judâ il percors formatîf e educatîf, che se no, al podarès jessi metût a risi. La scuele e à cussì decidût che lis studentessis a puedin rivâ a scuele cuviertis dal dut e che a puedin jentrâ dentri dopo che e je stade verificade la lôr identitât, ma dal mont de politiche a son tacadis lis critichis a cheste decision.

Cussì il conseîr regjonâl di Forza Italia, Roberto Novelli, dopo vê sotlineât che la scuele e je un lûc di inclusion, al à visât che: “Il niqab al è incompatibil cu la nestre culture. Il fondamentalisim islamic nol à di jentrâ intes aulis e plui in gjenerâl, nol à di passâ i nestris confins”.

Ancje il cjâfgrup in consei regjonâl dal Pd Diego Moretti al è stât une vore clâr: “La integrazion e la convivence pacifiche intune comunitât a àn di jessi concets e regulis di fonde di rispietâ. La muse taponade, in chest câs, al è un ostacul ae plene integrazion, soredut dentri di une scuele”. Par chest Moretti al à scrit ae diretore dal Ufici scolastic regjonâl, Daniela Beltrame, indulà che al domande che al sedi proibît il vêl integrâl dentri des scuelis dal Friûl-Vignesie Julie.

Intant la Lega Fvg e à inmaneât tal dopomisdì a Reane une conference stampe che dilunc di chê a saran presentadis ciertis propuestis par dâ cuintri al ûs di struments di opression des feminis dentri di scuelis, ospedâi e ents publics. (a.d.g.) – 04.02.2025

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Progjet finanziât de ARLeF
Agjenzie Regjonâl pe Lenghe Furlane

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui