Siet personis a son restadis cjapadis dentri intun incident cheste matine, ator des 7, a S. Vît dal Tiliment, ae altece de taronde di Savorgnan, ae crosere tra vie Treviso e vie Santa Petronilla.
Il vuidador dal mieç doprât pal traspuart di plui personis al à pierdût il control, terminant la corse intun fossâl a ôr strade.
Dopo la clamade al Nue112, i infermîrs de Sores a àn inviât sul puest l’elisocors e dôs ambulancis di Sant Vît e di Pordenon. Alarmâts daurman ancje i pompîrs rivâts dal Distacament di S. Vît.
Une persone, feride in mût plui seri, e je stade traspuartade cul elicotar al ospedâl Santa Maria della Misericordia di Udin par un traume al bacin e al cjâf.
Altris trê a son stadis acompagnadis cu lis ambulancis al pront socors di Pordenon e di S. Vît, intant che chei altris trê passizîrs dal furgoncin a son stâts controlâts sul puest. (ADG) – 26.11.2022
