Cuindis personis (nûf oms sîs feminis, ducj citadins de Union Europeane) a son stadis puartadis inte Cuesture di Udin indulà che ur àn notificât il sfuei di slontanament de citât. Doi di lôr a son stâts ancje arestâts: un par danezament e resistence a public uficiâl, che al è stât puartât in preson, un altri par resistence a public uficiâl e metût ai arescj domiciliârs.
Chestis personis a jerin intal grup di 200-300 di lôr che îr sot sere in place I Maggio a àn cirût di sfuarçâ il cordon des fuarcis dal ordin che par blocâju a son stâts doprâts ancje lacrimogjens e i idrants. Fintremai di chel moment il corteu a Pro de Palestine nol veve dât problemis e ancje il servizi fat par garantî l’ordin fat dai organizadôrs dal corteu al veve cirût di blocâ cheste int che plui di cualchidun al pense che e sedi rivade di fûr regjon dome par fâ disordin.
Dilunc dai scuintris a son restâts ferîts ancje doi gjornaliscj, un di Rainews 24 che al à cjapat un clap inte gjambe e un di Local team che al à vude un feride sot dal voli e al è stât puartât tal ospedâl di Udin.
A son undis i agjents restâts ferîts: sîs poliziots a son stâts puartats tal ospedâl par jessi curâts. Cundut dai dams fats in place I Maggio, la fuarte presince des fuarcis dal ordin (passe trê mil agjents dai 11 ai 15 di Otubar) e à garantît che inte citât e li dal stadi e fos avonde sigurece. (a.d.g.) – 15.10.2025
