A son tacadis vuê tal dopomisdì lis ricercjis di une cubie di escursioniscj, om e femine, che di lôr no si sa plui nuie de serade sul tart di miercus, cuant che a àn fate la ultime telefonade, tor des dîs e mieze sot sere.
L’alarme al è stât dât di un de famee che al à contât che la cubie e veve in program di cjaminâ dilunc dai trois Cai 352 e 353, dal ripâr Pordenone al ripâr Padova passant pe Val di Arade, trois considerâts impegnatîfs. La auto dai doi escursioniscj, come che a àn aciertât i carabinîrs e je ancjemò parcade dongje dal ripâr Pordenone a Cimolais, indulà che la cubie e veve prenotât par joibe di sere ma non son mai rivâts.
Tes operazions a son in vore Vigjii dal fûc dai comants di Pordenon e Belum, adun cui tecnics dal Socors alpin de Val de Ciline e de provincie di Belum, judats ancje di elicotars. (a.d.g.) – 06.07.2026
