Cubie cjapade sot a Udin suntun passaç pedonâl

Un om di 57 agns e la sô femine di 55 a son stâts tirâts sot vuê di matine tor des 10 in viâl della Vittoria intant che a stavin passant sul passaç pedonâl tra vie Liruti e vie Giovanni da Udine. Par causis sot investigazion de Polizie locâl une machine vuidade di une siore di 85 agns che e stave lant bande Zardin Grant ju à cjapâts in plen. Par vie dal bot i doi a son stâts butâts par tiere dopo vê batût sul tapon dal motôr e sul parebrîs.

Sul puest a son rivâts daurman i sanitaris dal 118 e i agjents de Polizie locâl. La cubie e je stade puartade cu la ambulance tal ospedâl di Udin cun cetantis feridis, ma par fortune no saressin in pericul di vite. (a.d.g.) – 18.12.2025