Corot tal mont dal schi regjonâl pe muart dal zovin Marco Degli Uomini

Al è muart îr tor misdì, tal ospedâl di Udin, Marco Degli Uomini, il zovin di 18 agns che sabide si jere fat mâl su lis pistis dal Çoncolan intant che al vignive jù par alenâsi .

Il zovin, che al jere dal Sci Club Monte Douda, al jere stât puartât daurman dopo dal incident tal ospedâl di Tumieç, indulà che al jere stât operât par justâ la gjambe spacade, ma tal zîr di pocjis oris lis sôs cundizions si son ingriviadis.

Al somee che a provocâ la sô muart e sedi stade une embolie di gas, un fat râr causât de rivade tal sanc di gras o medole dai vues lât dopo intes arteriis dai polmons.

Il zovin al jere a stâ cu la famee te frazion di Betania a Tumieç. La Fisi dal Friûl-Vignesie Julie e à fermât dutis lis ativitâts. (a.d.g.) – 10.03.2025