Corot pe muart di pre Padovese, om di glesie e di culture

A 89 agns, pôcs dîs prime dal so complean, al è muart pre Luciano Padovese, un dai predis plui in viste de Diocesi di Concuardie-Pordenon. Par agns anime e diretôr de cjase dal student di Pordenon, pre Padovese al è stât teolic e autôr di diviers volums di etiche sociâl e morâl. “La sô muart – al scrîf intune note il Circul de Stampe, che lu contave tra i siei socis onoraris – e lasse Pordenon e il teritori cence un zigant de culture e de informazion”. Pre Padovese al veve scomençât la ativitât tal 1967, colaborant ae realizazion di une mostre di art inte Cjase dal student, vuê Centri culturâl “Casa Antonio Zanussi”, implantade e direte cu la poie determinante di Lino Zanussi. (A.I.) – 21.12.2022