Tragjic incident vuê sul cricâ dal dì a Pasian di Prât dilunc de strade Ss 13 Pontebane, ae altece dal cjamp di svol di Cjampfuarmit. La auto vuidade di Aldo Maklaj, 20 agns di Udin, e je lade cuintri di un camion che al rivave de bande contrarie. Il zovin al è muart pes feridis une vore griviis.
Corot grant pe muart di Maklaj, che al stave lant a vore, tal mont dal balon. Fin a doi agns indaûr al veve zuiât come portîr te scuadre OI3 di Faedis. Al veve scugnût lassâ la ativitât agonistiche par problemis di salût, ma la passion pal balon e jere simpri tante e al jere un brâf fantat, plen di voie di fâ.
La Fiesta vuidade di Maklaj e stave lant bande Codroip cuant che a un ciert pont si è spostade su che altre corsie, no si sa se par un colp di sium o par un mâl, lant a sbati cuintri di un camion.
Sul puest a son rivâts daurman i sanitaris dal 118 e i vigjii dal fûc, ma il zovin magari cussì no al jere za mancjât.
I mieçs cjapâts dentri dal incident a son stâts metûts sot secuestri dai carabinîrs e a son a disposizion de autoritât judiziarie. (a.d.g.) – 04.09.2025
