Controi straordenaris dilunc des stradis dal Friûl ocidentâl sabide ai 25 e domenie ai 26 di Març de bande di patuliis de Polizie di Stât, dai Carabinîrs, de Vuardie di Finance e cul concors dai Comants di Polizie Locâl intai comuns di Daçan, Cjasarse, Cjons, Cordenons, Cordovât, Flum Venit, Manià, Morsan, Purcie, Pasian di Pordenon, Pordenon, Prate di Pordenon, Lavorêt, Sacîl, S. Vît dal Tiliment, Siest, Spilimberc e Çopule.
A son stadis impleadis sul teritori in dut 26 patuliis e 52 agjents, che a àn controlât 949 veicui e 549 personis, contestant 77 violazions al Codiç de Strade, cu la decurtazion di 100 ponts des patentis, il ritîr di cuatri patentis e vot cjartis di circolazion.
In particolâr, inte serade di sabide ai 25 di Març, dilunc de Strade regjonâl 13 – Pontebane, a son stâts fats controi cuintri la vuide dopo vê bevût o vê cjapât droghis. A son risultadis positivis ae vuide sot de influence dal alcul trê personis, che di chês une e je stade denunziade in stât di libertât ae Procure de Republiche li dal Tribunâl di Pordenon par vuide in stât di ebreitât. (A.D.G.) – 27.03.2023
