La Vuardi di finance di Pordenon e à discuviert cinc aziendis agriculis dal Friûl Ocidentâl che a àn domandât dôs voltis contribûts, sedi al Gjestôr dai Servizis energjetics (Gse), sedi ae Regjon Friûl Vignesie Julie par meti jù implants fotovoltaics.
La investigazion e je tacade par controlâ la posizion di ciertis aziendis cuant che si fevele di bêçs dâts te suaze dai invistiments dal Pnrr. I financîrs a àn cussì cjatât che ciertis aziendis a vevin presentât domande di contribût par otignî altris 588 mil euros ae Regjon, dopo che a vevin za cjapât une vore di bêçs dal Gse par vê instalât panei fotovoltaics .
La ativitât dai financîrs e à cussì permetût ae Regjon di no paiâ e sparagnâ chei bêçs par altris iniziativis a pro dal teritori. Il compuartament des cinc impresis al è stât ancje segnalât al Gse che al fasarà lis sôs valutazions. (a.d.g.) – 17.06.2025
