Al è stât sotscrit te Electrolux di Purcie il contrat di solidarietât. La firme e je stade fate vuê dopomisdì a Bologne, dopo 6 oris di contratazion. I sindicâts (in Emilie a jerin presints ancje la Fim Cisl e la Fiom Cgil di Pordenon) duncje a àn dit ‘sì’ ae domande de aziende, a front di un ûs de casse integrazion cuasi esaurît e de situazion di bloc dal marcjât dal eletrodomestic. Il contrat al valarà ancje pal implant di Forlì.
“Lis venditis – al sclarìs Walter Zoccolan, leader de Rsu di Purcie – a son plui bassis des previsions e in Friûl i soreplui a son un centenâr. Il contrat di solidarietât, de validitât di 6 mês, nus permet di rivâ fin ae fin dal an. Pal 2024 – al continue – lis previsions a viodin une riprese dal marcjât, ancje se i dubis no mancjin”. A front di une capacitât produtive di 750 mil laveblancjarie par an, lis previsions pal 2023 a fevelin di une produzion di 583 mil tocs.
Il contrat di solidarietât al previôt une riduzion dai doi turnis zornalîrs di 8 a 6 oris. “Il strument dal orari al sarà prevalent – al va indevant il sindicalist – e a saran interessadis dutis lis maestrancis, ancje se a podaran jessi diviersis modalitâts daûr lis dibisugnis e des esigjencis de aziende”. (a.d.g.) – 12.09.2023
