A vadin indenant lis celebrazions pai 50 agns dal taramot. Daspò dal apontament cu la messe celebrade dal cardinâl Zuppi tal plaçâl de caserme Goi-Pantanali, fate domenie dopomisdì cuant che a jerin presints passe 5 mil citadins, cumò e sta lant indenant la sentade straordenarie dal Consei regjonâl, simpri a Glemone dentri dal Cinema Teatro Sociale, indulà che a son presints ancje il president de Republiche Sergio Mattarella e la president dal Consei Giorgia Meloni, di lâ di ducj i rapresentants de Regjon (al à fevelât il president Massimiliano Fedriga) e dai Comuns, che al è tocjât al sindic di Glemone Roberto Revelant vierzi cul so salût la sentade.
Ducj, ancje Meloni, a àn sotlineât il fat che cundut dal dolôr e de distruzion provocade dal Orcolat, i furlans no si son pleâts e an dât vite a un model innomenât par ducj chei che a àn a ce fâ cu lis emergjencis.
Il president de Repubbliche Mattarella daspò vê ringraciât il president dal Consei regjonâl, Mauro Bordin, pal invît e al à visât i moments plui tragjics vivûts dal Friûl in chê sere dai 6 di Mai, cul corot jentrât in dutis lis fameis, la fuarce dai furlans e il lavôr di cui che al à vuidade la ricostruzion ancje in graciis de solidarietât dal Paîs e di dut il mont.
Pôc prime Mattarella, cun dongje meloni e Fedriga, al veve puartât une corone in memoreament des vitimis dal taramot denant dal monument che si cjate tal cimitieri.
Dutis lis cerimonis a son stadis mostradis in direte di T&elefriuli. (a.d.g.) – 06.05.2026
