Confin ancjemò sot control cu la Slovenie

Altris sîs mês di confin sot control. Il ministri dal Interni Matteo Piantedosi al à fevelât par telefon cul so coleghe Bostjan Poklukar par visâlu de decision di mantignî par altris 180 dîs il presidi di control cu la Slovenie.

A pesâ une vore la situazion di crisi in Orient e il risi di atentâts, ancje par vie de presidence di turni taliane dal G7. “Come simpri – al à dit Piantedosi – i controi a saran fats cirint di creâ il fastidi plui piçul pussibil ae circolazion sul confin e al trafic des marcjanziis”. Al sarà un Istât une vore cjalt sul confin daspò dal ingrès te aree Schenghen dai prin di Zenâr, pai timps di spiete par rivâ su lis splazis de Istrie. (a.d.g.) – 22.05.2024