Il Tribunâl di Udin al à condanât Andrea Martinis, sindic di Preon e Renato valent, coordenadôr de Protezion civîl comunâl dal paîs a un an di preson, pene sospindude, pal omicidi colpôs di Giuseppe De Paoli.
Il volontari de scuadre locâl de Protezion civîl al jere stât tirât sot e copât di une çocje grande ai 29 di Lui dal 2023, intant che al cirive di liberâ dai arbui colâts jù par vie dal maltimp la strade forestâl che e puarte bande il salt di aghe dal Arzin.
I doi oms invezit a son stâts sfrancjâts su la cuistion de sigurece cu la formule “parcè che il fat nol è previodût de leç tant che reât”. Il judiç Daniele Faleschini Barnaba ju à ancje condanâts a paiâ ae famee de vitime 50 mil euros di provisionâl.
Pai avocats che a difindin Martinis e Valent , che a àn pandût il ricors in apel, cheste sentence e varà consecuencis sul sisteme de Protezion civîl. (a.d.g.) – 31.03.2026
