Condanade par vê robât 47 mil metris cubis di gas a Roncjis

Je e il so om a vevin rot i sigjîi al contadôr dal lôr ristorant a Roncjis, gjavant, dal 2014 al 2018, cuasi 47 mil metris cubis di gas cence paiâ.

Par chest il judiç Paulo Lauteri dal tribunâl di Udin al à condanât une femine di 55 agns a vot mês di reclusion, pene sospindude. In passât, l’om al veve patizât pe stesse acuse cinc mês e dîs dîs di preson.

La scuvierte de robarie e je dal Setembar di cuatri agns indaûr, cuant che il tecnic de Italgas al à ispezionât il contadôr dal locâl, vendût dal om ae femine pôcs mês prime, e notâde la roture dai sigjîi mitûts intal Jugn dal 2014 par intart. Alore il valôr dal gas gjavât al rivave a pôc plui di 6.300 euros, ma ai presits di cumò al sarès di 10 voltis superiôr. (ADG) – 20.09.2022