Condanade par fraude su lis mascarutis pe Protezion civîl

Intai prins dîs de emergjence Coronavirus e veve consegnât miârs di mascarutis no conformis ae Protezion civîl dal Friûl-Vignesie Julie. Une imprenditore cinese di 29 agns, residente a Udin, e je stade condanade a dîs mês di reclusion cul rituâl scurtât. La femine e je stade ricognossude colpevule di fraude in furniduris publichis dal Gup di Udin Carlotta Silva.

Intal Març dal 2020, la femine, rapresentante legâl de societât Charming Europe cun sede a Triest, e veve fat un contrat cu la Protezion civîl pe furnidure di 15 mil mascarutis KN95 par 40 mil euros. I dispositîfs a son stâts consegnâts, ma a son risultâts cence fassicul che al ateste la conformitât tecniche e la marche CE. (ADG) – 24.11.2022