La Cort di Assise di Udin e à condanât Silvia Comello a 25 agns di preson par vê copât Stefano Jurigh, ricognossint lis atenuants gjenerichis ecuivalents aes agravants dai motîfs futii de crudeltât e de difese sbassade. La femine e je ancje stade condanade a risarcî la fie dal om, copât ai 4 di Mai dal 2024 inte sô cjase di Bicinins, cun 200 mil euros, come che al veve domandât l’avocat di part civîl Elisa Puntin.
Il public ministeri Andrea Gondolo al veve domandât la pene dal ergastul e inte sô recuisitorie al veve sotlineât il fat che la muart dal om e jere leade aes scurtissadis cjapadis. Pe acuse, Comello chel dì e jere buine di intindi e volê e che dutis lis azions fatis a confermavin la sô colpevolece.
L’avocat difensôr de Comello, Irene Lenarduzzi, e veve invezit domandade la assoluzion pe totâl incapacitât di intindi e volê, parcè che la femine, che e jere in cure par problemis psichics, chel dì e veve patît un episodi di deliri. (a.d.g.) – 26.02.2026
