Cjoc suntune moto, i carabinîrs i corin dâur e lu blochin

Episodi par da bon movimentât pandût dai carabinîrs de Compagnie di Cividât. Tai dîs passâts, a Tarcint, un om di 37 agns dal puest, no si è fermât cuant che i carabinîrs de stazion locâl, adun cui coleghis di Pradielis, a àn cirût di fermâlu par un control. Al è cussì tacât un inseguiment cul motociclist che al faseve manovris pericolosis fintremai cuant che i militârs no àn rivât a blocâlu.

L’om al è risultât positîf al alcul test e par chest al è stât denunziât in stât di libertât par vuide pericolose e vuide in stât di ebrietât, cul ritîr de patente e il secuestri de moto.

Simpri a Tarcint al è stât fermât ae vuide de auto, un forest zovin cun dentri un baston e 0.49 grams di eroine. (a.d.g.) – 17.06.2026