Tai dîs passâts i agjents de Polizie di Udin a àn secuestrât plui di 200 grams di droghe hashish dopo che un citadin al veve visât di moviments stranis de bande di un pâr di zovins extracomunitaris che sul tart a mateavin dongje di un arbul dentri dal parc clamât “zardin dal Vescul” tal centri de citât.
Cuant che a son rivâts sul puest, i agjents si son inacuarts che intun plet la tiere e jere stade lavorade e dopo vêle tirade vie par 30 centimetris a àn cjatât doi pacuts di droghe metûts dentri di une cjarte di robe di mangjâ cun cjocolate. Il dì dopo, doprant un cjan antidroghe, a son saltâts fûr altris 150 grams di droghe.
La polizie e à visât che al è une vore impuartant fâ atenzion soredut se si puarte ator frutins tai zardins, parcè che sedi la cjarte doprade, sedi il mût di platâ, al è il pericul che un piçul al puedi cjatâle e scambiâle par robe di mangjâ. (a.d.g.) – 12.03.2025
