Cjatât muart l’escursionist colât jù a Frisanc

Al è stât cjatât cence vite l’escursionist colât jù dilunc dal troi 973 tal teritori di Frisanc. L’alarme al jere stât dât vuê, tor misdì e mieç, inte zone tra Casere Valine e Casere Salinchiet, parsore Pofabri, a plui o mancul 1.300 metris di cuote, intune aree a Nord cu presince probabil di nêf. A domandâ jutori al jere stât l’amì che al jere cu la vitime dilunc de cjaminade.

Su la fonde des primis ricostruzions, l’om al sarès sbrissât lant jù par un canalon par plui di 200 metris. Sul puest a son rivâts i tecnics dal Socors alpin di Manià puartâts in cuote dal elisocors regjonâl. Cuant che a àn cjatât l’om, magari cussì no al jere za muart. (a.d.g.) – 19.03.2026