Fin des sperancis e des ricercjis. Leonardo Cudini, il fantat di 23 agns di Codroip che di lui no si vevin plui notiziis di sabide di matine, cuant che al jere jessût di cjase in biciclete par lâ al lavôr, al ristôr Spuntino di Campagna, al è stât cjatât cence vite dentri di une aree boschive dal Codroipin. Esclududis responsabilitâts di tierçs.
A cjatâ il cadavar, inte matine sul tart di vuê, lis scuadris dai socoridôrs che di îr dopomisdì, cence fermâsi, a jerin daûr a bati il teritori palme a palme.
Aes ricercjis a àn partecipât lis Vuardiis dal fûc cun scuadris ordenariis, espertis Tas e scuadris cinofilis cun personâl dai comants di Udin, Pordenon e Gurize. Îr dopomisdì al jere stât ativât ancje l’elicotar dal Repart svol dal comant atents dal fûc di Vignesie.
Impegnâts ancje carabinîrs e volontaris de Protezion civîl di Codroip e Talmassons.
A denunziâ la sparizion dal fi al jere stât il pari, Mauro Cudini, pensionât. L’om fint al ultin al à sperât che so fi, student universitari di Informatiche a Padue, al podès jessi cjatât vîf. Cheste matine invezit ogni sperance si è arenade. (A.D.G.) – 22.05.2023
