Al è stât cjatât muart sot sere il vieli che îr, joibe ai 9 di Lui, tal dopomisdì al jere stât dât l’alarme parcè che no si saveve nuie di lui. Lis ricercjis a jerin tacadis tor de 6 sot sere cuant che I Vigjii dal fûc a vevin mandât par cirîlu une scuadre di Glemone, il personâl specializât tal socors in aghe e ancje altris specialiscj. Cun di plui a jerin stâts rivâts ancje i subacuis dal Nucli regjonâl di socors subacui e il Nucli regjonâl cinofil, simpri dai vigjii dal fûc.
Al è stât clamât in jutori ancje l’elicotar dal repart di svol dal Comant di Vignesie che, pôc dopo jessi rivât parsore de zone, al à daurman individuât tal canâl Ledre il cuarp dal puar om.
Par recuperâlu a son intervignûts i subacuis. Sul puest ancje i carabinîrs, che di lôr e jere partide la segnalazion. (a.d.g.) – 10.07.2026
