Intal Comun di Cordovât, in localitât Bielvedê, intun dai scandais archeologjics fats intal ambit de procedure di Verifiche preventive di interès archeologjic pe realizazion dal Metanodot Mestre -Triest intal toc Silea – Gonars, Lot 2 di Snamrete Gas Spa, a son vignudis fûr, a une profonditât di 1,70 metris dal plan di campagne , lis primis evidencis archeologjichis di chê che si pues definî une scuvierte straordenarie inte zone.
Fin a vuê, lis ricercjis archeologjichis di aprofondiment a son ladis indenant in alternance cu lis esigjencis dai lavôrs dal cantîr pe instalazion dal metanodot, fate de dite Denysnv.
I sgjâfs archeologjics, sot de direzion sientifiche de dotore Serena Di Tonto de Sorintendence archeologjie, bielis arts e paisaç dal Friûl-Vignesie Julie, a son fats de societât Archeo.Kun Srl di Parme cuntun grup di professioniscj.
Il sît al è stât delimitât dilunc dal as di sgjâf dal metanodot par une lungjece totâl di 200 metris e dentri di cheste, intune porzion di cirche 100 metris, si è notade la presince di rescj struturâi di un insediament di ete romane.
Par preservâ i rescj dal insediament e permeti il sgjâf in estension, si è studiade cu la Comitence e cu la dite che e fâs i lavôrs une variante dal percors dal metanodot, che, midiant de tecniche de trivelazion, al è stât intierât a une cuote plui alte di chê fissade intal progjet. Dopo la metude in vore des tubaduris, si è podût duncje lâ indenant cul sgjâf in estension dal insediament individuât.
Inte aree a son stâts identificâts i limits di dôs struturis e di un percors viari tra lis dôs. Di une des dôs struturis, cjatade inte porzion ocidentâl de aree analizade, al è stât individuât un sôl ambient cuntune pavimentazion di tessaris di modon e struturis murariis a nivel de fondazion.
La struture plui orientâl, invezit, e je plui articolade, e a son stâts metûts in lûs trê ambients e une aree esterne, cun plans dal paviment in glerie e sclesis di modon e struturis murariis plui altis.
Tra lis dôs struturis al è stât identificât un lastri che al à un orientament di Est a Ovest, cu lis cjaradoriis che si puedin viodi inmò ben par cuasi dut il plan.
La stratigrafie studiade, i materiâi racuelts e lis tecnichis murariis metudis in vore pes struturis ediliziis a permetin di datâ il sît tra il secul I/II d.d.C. fin al IV d.d.C.
Al moment, si è ancjemò daûr a fâ ricercjis par podê definî miôr lis carateristichis di dut il complès e rivâ a vê une comprension plui clare des struturis.
Ce che al è stât cjatât al rapresente une scuvierte archeologjiche straordenarie no dome parcè che no son sgjâfs compagns inte zone, ma ancje pai dâts impuartants che al è daûr a furnî su lis diviersis tecnichis ediliziis dopradis, pai materiâi cjatâts, pal studi de planificazion teritoriâl antighe inte zone e pe definizion dal cors antîc dal Tiliment in ete romane. (A.D.G.) – 20.03.2023
