Il cuarp carbonizât di un om al è stât cjatât vuê di matine intal mieç dai cjamps, aes puartis di Codroip.
A cjatâ il cadavar, che al è ancjemò di identificâ, al è stât un dipendent dal Consorzi di bonifiche dal Plan furlan. Intant che al controlave la zone di sô competence Denis Venuto al à viodût, tor des dîs di matine, une strane magle scure di brusât dentri di un canalut, doprât tal câs di emergjencis.
Cuant che si è svicinât, il tecnic al à viodût che si tratave dal cadavar di un om tra i 35 e i 40 agns. Dongje dal cuarp a saressin stâts cjatâts une taniche di benzine e un contignidôr plui piçul di acit muriatic. La muart si pense che a sedi stade vie pe gnot.
Sul puest a son rivâts i carabinîrs pai rilêfs e dute la zone e je stade blocade par podê fâ i aciertaments sientifics. Al è pussibil che si trati di un gjest volontari, ma pal moment no je lassade fûr nissune ipotesi. (a.d.g.) – 27.07.2026
