I carabinîrs a àn arestât sot sere a Paulêt doi oms di 31 e 26 agns, ducj e doi forescj che a vivin a Udin, daspò ve cjatât inte lôr machine doi chilis di droghe.
I carabinîrs dal Nucli Radiomobile de Compagnie di Udin, adun cui coleghis de sezion operative, a stavin fasint un control normâl su la circolazion stradâl. Cuant che a àn fermât la auto si son insuspietâts par vie dal fâ dai doi e, judats di coleghis in borghês a àn controlât ben la machine. Sot de ruede di scorte a jerin stâts platats 20 pacuts di plastiche cun dentri in dut doi chilis di hashish, pronte par jessi vendude a Udin.
La droghe e je stade secuestrade, intant che i doi forescj a son stâts puartâts in preson a disposizion dai judiçs cu la acuse di detenzion di droghis cul fin dal spaç. (a.d.g.) – 20.04.26
