Cheste volte ai delincuents e je lade mâl. I carabinîrs dal Nucli operatîf e Radiomobile de Compagnie di Udin, cul jutori dai coleghis de Compagnie di Tumieç a àn blocât i fraudadôrs pôc lontan de cjase indulà che a vevin puartat vie zoiis e bêçs.
Il fat al è sucedût a Glemone, indulà che un carabinîr fals al veve clamade al telefon une siore intimpade par visâle che il fi al jere stât cjapât dentri di un incident e che a coventavin bêçs par tirâlu fûr des rognis. La siore e veve cussì consegnât tes mans di un secont delincuent che si jere presentât a cjase, simpri disint di jessi un carabinîr, bêçs e zoiis par un valôr di passe 45 mil euros.
A spietâju a jerin però i carabinîrs, chei vêrs, che ju àn cjapâts cun intor ancjemò la robe puartade vie. Si trate di un talian e di un forest che a son a vivi in Campanie. La robe recuperade e je stade daurman tornade ae siore intant che i doi malvivents a son stâts puartâts drets in preson a Udin. (a.d.g.) – 04.05.2026
