Cjapâts altris doi passeur, cheste volte a Gurize

Dopo i arescj di doi passeur serps a Tarvis, cheste volte la Polizie di frontiere e à arestât in flagrance doi citadins bulgars par favoriment de imigrazion clandestine. I doi a son stâts fermâts, intai dîs passâts, dal personâl de Polizie di Frontiere di Gurize, coadiuvât di personâl de Vuardie di Finance, dongje dal ex pas di confin di Sant Andree.
A viazavin dentri un furgoncin, cun targhe polache, adun cun siet citadins irakians – che trê di chei minôrs – cence documents.
Dopo la validazion dal arest, i doi passeur a son stâts dispresonâts e slontanâts dal teritori dal Friûl Vignesie Julie par un periodi di cinc agns;  il furgoncin e i telefons celulârs in lôr possès a son stâts secuestrâts. (ADG) – 30.09.2022