Ancjemò une impuartante operazion des fuarcis dal ordin cuintri dai delincuents che a stan batint cu lis fraudis il Friûl. Lunis ai 23 di Març, sot sere, i carabinîrs di Pordenon a àn arestât cu lis mans tal sac un om di 39 agns e une femine di 41 agns, ducj e doi che a rivin de Campanie e cence lavôr, par fraude ingriviade.
La fraude e jere tacade a Travês cuintri di une vedue di 91 agns, clamade di un maressial fals che al domandave bêçs par vie di un incident che la fie de siore e veve provocât. La vitime e jere colade inte rêt dai fraudadôrs e e veve consegnât 800 euros e zoiis di aur a une femine che si jere presentade a cjase tant che avocat. La siore però e à clamât daurman il 112 e i carabinîrs a àn intercetât i doi intant che a jerin a Tresesin suntune auto cjapade a nauli, recuperant dute la robe puartade vie. I doi fraudadôrs e a son stâts puartâts drets in preson. Magari cussì no, la situazion e je grivie parcè che dome tra îr e vuê la centrâl operative dai carabinîrs e à regjistrât 11 tentatîfs di fraude che par fortune no son lâts ben. (a.d.g.) – 25.03.2026
