I carabinîrs di Triest, soredut chei de Compagnie di vie Hermet a stavin daûr dal om di une vore di timp parcè che al fraudave doprant documents di identitât falâts. Daspò di investigazions coordenadis de Procure de republiche di Triest, i militârs vie pe sere dal prin di Avost a son jentrâts, adun cui coleghis dal nucli investigatîf, inte cjase di un citadin marochin di 33 agns, in vie Vergherio, par une percuisizion.
Dentri de cjase e je stade cjatade droghe (marihuana e cocaine), un belancin di precision, doi computer portatii, 10 telefonins e ancje une pistole che no jere denunziade, cence che l’om za cognossût aes fuarcis dal ordin al fos bon di displeâ parcè che al veve chê arme.
Il marochin al è stât daurman arestât e puartât te preson di Triest a disposizion de autoritât judiziarie, intant che dut il materiâl cjatât al è stât metût sot secuestri. (a.d.g.) – 26.08.2025
