63
I agjents dal Cuarp forestâl regjonâl a àn cjapât un braconîr che al traeve ai cenglârs di dentri cjase sô, dilunc di une operazion fate a Cuar di Rosacis, coordenade de Procure de Republiche di Udin. L’om, che al è ancje cjaçadôr, al tirave dongje i animâi doprant robe di mangjâ par dopo traiur intant che al jere dentri cjase, cence curâsi in nissun mût, par mês, dal pericul che al creave par vie dal so compuartament.
Dilunc de percuisizion inte abitazion, lis vuardiis a àn cjatât e secuestrât doi fusii – un regolâr cuntun visôr par viodi tal scûr e un che al jere cence matricule – di là di une fototrapule e di rêts par cjapâ uciei. Al om e je ancje stade contestade la detenzion di cjans in spazis masse piçui. (a.d.g.) – 05.11.2025
