Une buine gnove e rive dal Friûl Ocidentâl, batût di delincuents che a cirin di fraudâ soredut i vielis.
Tal dopomisdì di martars ai 26 di Mai (la gnove e je stade pandude vuê), i carabinîrs de stazion di Daçan, adun cui coleghis dal Nucli radiomobile, a àn arestat un 47 agns pat fraude tentade.
Al jere un di chei che a fasin finte di jessi carabinîrs par puartâ vie bêçs e zoiis ai vielis, ma cheste volte al à cjatât une siore sgrimie che no si è fate freâ. Cuant che tor de 5 di dopomisdì e à cjapade la telefonade di un che al diseve di jessi carabinîr e che al veve di controlâ lis zoiis che e veve par vie di une rapine intune buteghe, la siore di 88 agns e à clamât daurman il 112 par segnalâ il fat. In pôc timp, la centrâl operative di Pordenon e à fat rivâ sul puest sedi patuliis in borghês, sedi chei in divise che a àn spietât il delincuent. A un ciert pont a àn viodût un chel al smontave di un taxi e al tacave a torzeonâ ator de cjase de siore cuntun fâ suspiet. Cuant che al à viodût i carabinîrs l’om al à cirût di scjampâ ma al à rivât a fa pôcs metris e al è stât blocât.
La percuisizion personâl e à permetût di cjatâ il telefonin doprât dal malvivent par fevelâ cu la vitime. Si trate di un om di 47 agns, di Monza, che al è a vivi a Codroip, pront par lâ lâ de siore – che e veve za preparât lis zoiis – par puartâi vie la robe.
A cjase dal om a son stadis cjatadis altris zoiis, che si pense a sedin il risultât di altris fraudis, tant che si sta investigant par cirî di capî di cui che a son. Il fraudadôr al è stât puartat dret in preson a Pordenon. (a.d.g.) – 29.05.2026
