Ancjemò in azion i fraudadôrs cul truc dal carabinîr fals che al clame par un control daspò che e je stade une robarie intune buteghe dal oresin. A son stâts dîs i tentatîfs fats îr, ai 6 di Avost, intal Friûl Ocidentâl: par 8 di chei no je lade ben in graciis dal fat che i vielis si son ricuardâts dai conseis dai carabinîrs e a àn metût ju il telefon, ma in doi câs invezit il delincuent al à rivât a vele vinte.
Un câs al è stât a Lavorêt, indulà che une siore di 75 agns e à consegnât aur par cuatri mil euros; un altri al è lat a segn a Pasian ai dams di une siore di 82 agns che e à consegnât zoiis al delincuent dal valôr di 20 mil euros e bêçs par 100 euros.
Lis investigazions fatis dai carabinîrs di Sacîl adun cui coleghis di Prate e Fontanefrede a son tacadis daurman e, su la fonde des testemoneancis, i militârs a àn scuviert che il fraudadôr al doprave un taxi par movisi de stazion dai trens tant di rivâ a capî cui che al jere.
Di chel moment i carabinîrs a àn tacât a mandâ, in graciis de colaborazion de Polfer, la foto dal criminâl in dutis lis stazions dai trens bande dal Sud che il malvivent al varès podût doprâ, fintremai cuant che a Roma termini i agjents de Polizie di Stât no lu àn ricognossût, a pene che al lat jù di un Frecciarossa che al lave bande Napoli.
Intun lamp i poliziots a àn arestat un zovin di 19 agns origjinari de Campanie. Dentri dal so russac al è stât cjatât dut il botin e cussì ducj i ogjets puartâts vie a saran tornats indaûr aes vitimis. Intant il malvivent al è stât puartât dret te preson di Regina Coeli a Rome. (a.d.g.) – 07.08.2026
