Un om di 37 agns, che al è a vivi dongje Udin, al è stât arestât vie pe gnot dai 23 di Jugn a Glemone, intant che al cirive di puartâ vie la auto parcade inte cjase di Lorena Venier, il lûc indulà che al jere stât copât il fì Alessandro.
Il fat al è sucedût cuant che une patulie dai carabinîrs dal Nucli radiomobile de Compagnie di Tumieç, r stave controlant vie dei Lotti. I militârs a àn sintût stranis rumôrs rivâ de cjase che e je sot secuestri daspò dal omicidi. Tal moment che a son jentrâts tal curtîl par viodi ce che al stave sucedint, a àn cjatât l’om che al mateave par cirî di impiâ la Fiat Panda. Dongje imprescj, une clâf universâl e une batarie. Arestât di bot, l’om cumò si cjate ai arescj domiciliârs dentri cjase, indulà che al jere za obleât a restâ par altris motîfs e al varà di rispuindi di violazion dai sigjîi e di robarie tentade. (a.d.g.) – 24.06.2026
