Lis investigazions de Vuardie di finance di Belum a àn permetût di cjatâ il fraudadôr che al veve imbroiât doi fradis di Pordenon che a son in cundizions di fragjilitât psicologjiche.
L’om di 47 agns, di origjin marochine che al vîf a Ponte delle Alpi, al è acusât di vê profitât de debilece di cuatri personis – i doi fradis di Pordenon e altris dôs tal Belumat – puartant vie bêçs par 364 mil euros.
Lis investigazions de Vuardie di finance a àn permetût tal Setembar passât di arestâ il fraudadôr che al è stât metût prime in preson e dopo ai arescj domiciliârs cu la acuse di imbroi ai dams di incapaçs. Il marochin al veve ancje prometût di tornâ i bêçs, ma nol veve fat nuie.
Il Tribunâl di Triest, dopo che la Cort di Cassazion e veve mandât indaûr il ricors dal fraudadôr, al à cussì decidût che l’om al à di restâ ai arescj domiciliârs cun intor il braçalet eletronic. (a.d.g.) – 06.02.2025
