Vie pe sere di martars, ai 9 di Setembar, la Polizie di Udin e à arestât un talian par detenzion ilecite di dôs pistolis e di droghe.
I agjents de Scuadre mobile de Cuesture, dilunc di un servizi straordenari di control inte Basse, par prevignî e reprimi robariis, pôc dopo des 8 sot sere a àn controlat a Flumisel un om che, a pene che ju veve viodûts, al veve cirût di scjampâ cu la sô auto. L’om, citadin talian di 61 agns che al è a sta intune altre regjon, al platave dentri dal baûl une pistole semiautomatiche Beretta calibri 6,35, cun vot colps tal cjariadôr e il numar di matricule scancelât.
La percuisizion fate dopo inte cjamare di un bed & breakfast indulà che al durmive e à permetût di scuvierzi une altre pistole semiautomatiche Beretta 7,65 ancje che no tignude in maniere legâl, 40 grams di cocaine, un belancin e 7.800 euros in contants, vuadagnâts si pense cu la vendite de droghe.
L’om al è stât puartât dret in preson indulà che si cjate dopo che il Gip al à convalidât il so arest. (a.d.g.) – 15.09.2025
