Un om nordafrican cence cjase e iregolâr in Italie al à assaltât di daûr un vieli che al stave lant a pît cu la sô biciclete vie pe gnot.
La agression une vore violente e je sucedude sabide passade ai 1 di Avost dilunc viâl Europa Unita a Udin.
Il delincuent al à sburtât cun violence il puar vieli par tiere e i à puartât vie il tacuin che al veve dentri bêçs, cjartis di credit, documents e bogns par mangjâ, par dopo scjampâ di corse.
Par fortune, di chês bandis al passave in chel moment un tassist che al à mostrât, ae patulie de Scuadre di pront intervent rivade daurman sul puest, di ce bande che al jere scjampât l’om.
La cjace al om tacade sul moment e à dât un bon risultât pôc plui tart cuant che il nordafrican al è stât cjatât intant che al cirive ripâr dentri di un edifici bandonât pôc lontan di indulà che al veve fate la rapine.
A cjame dal om une vore di reâts par robariis, resistence e violence a public uficiâl e ancje un proviodiment di espulsion de Italie.
L’arestât al è stât puartât daurman te preson di vie Spalato par jessi a disposizion de autoritât judiziarie. (a.d.g.) – 05.08.2026
