Lis telefonadis dai citadins che a àn dât informazions preziosis rispiet ai tentatîfs di fraude, i carabinîrs pronts a intervignî. Chescj a son i ingredients che a àn permetût di fermâ e arestâ un fraudadôr intant che al stave puartant vie robe a une persone anziane a Maron di Brugnere, vinars ai 19 di Dicembar dal an passât.
La gnove e je stade comunicade vuê dai carabinîrs, che a àn displeât cemût, tacant de matine dai 19 di Dicembar, a jerin rivadis cetantis telefonadis aes Centrâls operativis di Sacîl e Pordenon, che a segnalavin tentatîfs di fraude doprant la tecniche dal fals carabinîr. Il fraudadôr al clamave e al contave di un robarie intune buteghe di zoiis, fate cuntune machine che e veve la targhe regjistrade ae vitime de fraude o a un parint strent. La domande e jere di consegnâ lis zoiis a un uficiâl dai carabinîrs in vistît comun, che al sarès rivât a cjase pôc dopo. Lis zoiis a saressin stadis puartadis vie par un “control” inte stazion dai carabinîrs.
La trapule e je saltade daspò de segnalazion di un tentatîf di fraude cuintri di une siore intimpade resident in vie Mazzini, a Maron di Brugnere, rivade tor dôs e mieze dopomisdì. I carabinîrs dal Nucli operatîf de Compagnie Sacîl, che a jerin za in alerte, a son rivâts daurman te zone cuntune machine vuarbe. Tor des trê dopomisdì a àn viodût un om denant dal puarton di une vile su vie San Michele, tal borc di Maron, e une Citroën C3 parcade dongje, che e jere stade cjapade a nauli.
La vitime e jere daûr a dâ al fraudadôr cualchi biliet di bancje e un peçot che cun dentri ducj i ogjets di valôr de famee, che a pesavin plui di 200 grams e dal valôr di plui di 10.000 euros, ma cuant che il criminâl si è inacuart dai carabinîrs, al è scjampât in machine bande S. Zuan di Cjavolan. La cjace e je lade indevant fin cuant che la machine e je stade fermade dai carabinîrs dal Grup radiomobile, dilunc de A27 tra Trevîs Nord e Vignesie, che a àn arestât il vuidadôr, un om di 56 agns de Campanie, che al è stât puartât daspò inte caserme.
L’om, un criminâl cuntune vore di precedents penâi, al è stât acusât di tentatîf di fraude ingriviade.
