Intal dopomisdì di vinars, ai 17 di Març, la Polizie di Stât di Udin e à arestât un citadin talian di 20 agns par robarie ingriviade di une biciclete di valôr.
Pôc dopo des cuatri dal dopomisdì, une Volante de Cuesture udinese e je stade inviade in vie Galileo, dulà che e jere stade a pene robade une biciclete inte rimesse là che e jere tignude. Il lari, scuviert di cualchi resident, al à abandonât l’ogjet su la rampe di jessude dai garages condominiâi e al è scjampât. Daûr di lui si jere metût un om, za in contat telefonic cui operadôrs de Sale radio, che ur à furnît une descrizion curade dal malvivent e dal so vistiari: i poliziots, rivâts in curt, lu àn blocât intune vie dongje.
Il fantat, cence cjase fisse, al vignive cjatât in possès di un russac cun dentri une smeriliadore a batarie e un disc di ricambi pal tai dai metai. I agjents a àn scuviert dopo che cun chel imprest il zovin al veve rivât a slidrisâ il sisteme antirobarie instalât su la ruede daûr de biciclete robade dal box, dulà che si sintive ancjemò l’odôr carateristic prodot dal ûs de smeriliadore. Il zovin duncje al vignive arestât par robarie ingriviade de violence su lis robis e puartât in galere, la biciclete tornade ae legjitime proprietarie, che e à presentât denunzie in Cuesture.
Inte matine sul tart di lunis, dulinvie la validazion dal arest, il Gip, sussistint la esigjence cautelâr di impedî la reiterazion dal reât, al à disponût cuintri il zovin la misure dai arescj domiciliârs inte residence di un parint. (A.D.G.) – 22.03.2023
