I Carabinîrs di Pordenon, cuntune operazion pardabon brilant, a àn cjapât doi dai cuatri components de bande di laris che a àn fat robariis in mieç Friûl.
Si trate di doi citadins albanês za arestâts intant che si cîr altris doi compliçs. Il grup al è acusât di vê fat almancul 13 robariis dentri di cjasis tra Fevrâr e Març dal 2023 in cinc provinciis dal Nord Italie, cul Friûl tra i teritoris plui batûts dai delincuents in azion a Sacîl, S. Vît dal Tiliment, Pasian, Vile di Flum, Codroip, Tisane e Dartigne.
La bande si moveve su autos Mercedes e Audi robadis, cun targhis faladis, robant sot sere. In pôc timp i delincuents a rivavin a jentrà e puartâ vie bêçs, zoiis e robe che e coste, cence dismenteâsi di svuedâ lis musinis dai fruts intes cjamarutis dai fruts. Fat il colp la bande e tornave bande de sô base in provincie di Milan.
Lis investigazions a son tacadis daspò une robarie a S. Vît dal Tiliment, in graciis de segnalazion che e jere stade viodude une auto sportive blancje che e coreve vie. Cussì i carabinîrs a àn rivât a ricostruî la trate fate de bande.
I doi arestâts, un om di 24 agns e un di 31 agns a son stâts puartâts intes presons di Varese e Lodi. I cuatri a àn di rispuindi di la des robariis ancje di ricetazion, e resistence a Public uficiâl par no jessisi fermâts a un puest di bloc a Crema. (a.d.g.) – 05.11.2025
