A son stâts passe un centenâr i intervents fats dai Vigjii dal fûc de nestre regjon par meti a puest i dam,s fats de burascje che si è scjadenade sot sere di îr, ai 22 di Jugn.
Arbui e ramaçs a tiere e struturis fiscadis dal aiaron a àn costret i pompîrs a lavorâ une altre volte par tornâ a vierzi stradis e meti in sigurece. Des vot sot sere e fintremai des 7 e mieze di vuê di matine i oms dai Comants di Udin e Pordenon a àn fat tal ordin 40 e 47 intervents. Altris 15 a son stadis lis operazions fatis dai pompîrs dal Comant di Gurize.
Lis scuadris a àn lavorât par tirâ vie lis plantis che a blocavin lis stradis e par meti in sigurece i cuvierts ruvinâts dal timpat, judadis ancje di une vore di volontaris des scuadris comunâls de Protezion civîl. Par fortune no son stâts ferîts. (a.d.g.) – 23.06.2026
