Si cjate tal ospedâl di Udin in cundizions griviis il zovin ciclist di 21 agns svolât vuê di matine intun canâl a Bevaçane di Lignan daspò jessi stât tamponât di une machine in vie Alzaia.
Il zovin al stave lant dilunc de strade dongje dal canâl Tagliamento cuant che une auto lu à cjapat fuart daûr tant che al è lât dret tal cors di aghe.
Al puest di fermâsi e judâ il ferît, il vuidadôr al à tirât vie la bici restade incjastrade intal parecolps par dopo slontanâsi daurman.
Un siôr che al passave di chês bandis al à dât l’alarme e sul puest a son rivâts i Vigjii dal fûc che a àn puartât fûr de aghe il ciclist par dopo lassâlu intes mans dai sanitaris dal 118 che lu àn puartat a Udin cul elicotar.
Sul puest ancje lis fuarcis dal ordin che cumò a stan cirint il pirate, controlant ancje i filmâts des telecjamaris. (a.d.g.) – 08.09.2025
