Il Nucli Carabinîrs dal Ispetorât dal lavôr di Udin, cu la colaborazion dai militârs des Compagniis di Udin, Palme e Tumieç intai ultins dîs, a àn rinfuarciât i controi intal setôr dai esercizis publics e de edilizie. La ativitât ispetive si è concentrade su la verifiche de ocupazion regolâr dai lavoradôrs e dal rispiet des normis in materie di sigurece, salût e igjiene sui lûcs di lavôr.
I controi fats su dut il teritori provinciâl a àn permetût di individuâ cetancj inadempiments in materie di sigurece sui lûcs di lavôr e ancje la presince di lavoradôrs in neri.
A son stâts controlâts un cantîr edîl a Udin, une pelearie a Manzan, un empori a Cjassà e doi ristorants etnics a Martignà e Glemone. Sessante i lavoradôrs controlâts; a son stadis sospindudis lis ativitâts di un esercizi public di ristorazion par lavôr neri e di un cantîr edîl, par violazions gravis su la sigurece. In complès a son stadis fatis sanzions par plui di 130 mil euros. (ADG) – 25.11.2022
