Il brut timp al continue a bati la nestre regjon. A Prepot a son problemis su la strade di Podresche par vie di arbui malsigûrs o colâts par vie dal aiar fuart. E je stade improibide la circolazion par precauzion e sul puest a son impegnâts i operaris dal Comun e i volontaris de Protezion civîl.
Problemis ancje a Flumisel – Vile Visentine. Par vie de alte maree e des precipitazions, inte matinade di vuê, in localitât Palazzatto, lis aghis dal canâl Tiel a son jessudis dal arzin inagant lis campagnis ator. Sul puest i funzionaris de Protezion civîl de Regjon pe consegne di sacs di savalon di meti parsore l’arzin di mût di contignî la esondazion, a supuart e insiemi cui operaris dal Consorzio di bonifica Pianura friulana. In colaborazion cui volontaris di Protezion civîl des scuadris comunâls di Cjamplunc e Visc, 250 sacuts a son stâts consegnâts ai operaris dal Consorzi.
Ancje par doman e je alerte meteo zale. (ADG) – 22.11.2022
