Intal arc di doi agns l’om al varès copât desenis di animâi di ogni gjenar, cjaçant cence licence o intai dîs improibîts.
A sô disposizion e veve une carabine detignude in maniere ilegâl. Par chest motîf un om di 30 agns di Tumieç al è stât condanât dal judiç Rossella Miele dal Tribunâl di Udin a 2 agns di reclusion. Intune cun lui al è stât condanât a cuatri mês di reclusion ancje un om di 66 agns pal copament di un cierf. Nissun dai doi però al larà in preson parcè che lis penis a son stadis sospindudis.
Tra il 2015 e il 2016 il braconîr al zirave par risiervis di cjace e areis protetis intai Comuns di Vençon, Mueç, Glemone e Pontebe: inte sô smire a son finîts cierfs, cjavrûi, cjamoçs, cenglârs, jeurs e ancje animâi protets tant che il stambec, intune ocasion cul aiût dal braconîr plui anzian. (ADG) – 28.10.2022
