Intai dîs passâts, il personâl dal Setôr Polizie di frontiere di Gurize, intal cors des ativitâts a contrast dal favoriment ae imigrazion che e ven de rote balcaniche, al à controlât un camion lizêr cun targhe rumene che al rivave de Slovenie, vuidât di un om rumen di 22 agns.
Intal spazi di cjame dal Fiat Ducato e jere une cistierne in vitroresine di gruessis dimensions, che e jemplave il casson. L’odôr fuart e cierts rumôrs a àn metût in suspiet i agjents: une volte lâts sù sul mieç, a àn scuviert che dentri a jerin folcjadis 32 personis dai trats asiatics.
L’acès ae cistierne no si podeve viodi dal esterni par vie che al jere mitût su la bande opueste a pet dai portelons di acès al spazi di cjame; e je risultade, cemût che al è di podê intuî, une modalitât tant pericolose di traspuart des personis, costretis a viazâ in cundizions precariis par lungjis distancis, cence podê vê un ricambi suficient di aiar o bevi.
Il passeur al è stât arestât e acompagnât inte Cjase Circondariâl di Gurize, a disposizion de Autoritât Judiziarie; il camion al è stât secuestrât, intant che i 32 citadins forescj a àn domandât protezion internazionâl. (A.D.G.) – 25.02.2023
