Dut al jere tacât l’an passât cuntun messaç sul telefonin: une cubie di viei di Mueç a son stâts a risi di pierdi passe 120mil euros par vie di une fraude informatiche une vore sofisticade che e je stade però blocade in graciis dal intervent dai carabinîrs.
I militârs de stazion di Mueç a àn denunziât ae Procure di Udin par fraude ingriviade un om di 55 agns, za cognossût aes fuarcis dal ordin che al jere jentrât in azion doprant il metodi dal “spoofing”, che al permet di doprâ identitâts e numars di telefon fals par jessi crodûts.
I doi viei a jerin stâts contatâts tal Mai dal 2025 e invidâts a clamâ daurman il numar di un centri cuintri des fraudis e dopo a vevin ancje cjapât une clamade false dai carabinîrs che il numar al someave chel vêr. Lis vitimis a jerin stadis convinçudis a colaborâ a une “investigazion” e a vevin fat une schirie di bonifics, ma in graciis dal intervent pardabon svelt dai carabinîrs di Mueç, che a jerin stâts clamâts in jutori, i bêçs a son stâts blocâts e tornâts indaûr. (a.d.g.) – 29.01.2026
