5/05/2022 – La pedofilie e je une menace costante par fruts e fantats. Une menace dificile di individuâ, parcè che cemût che al aferme il Dirigjent dal Compartiment Polizie Postâl e des Comunicazions Manuela De Giorgi, “vuê al passe il mont reâl e si difont ancje in linie”.
Il trend, ancje in F-VJ, al è preocupant, stant che la pedofilie e devente un pericul iminent ancje pai fruts plui piçui. Intal 2021 si è regjistrade une incressite dal 49% rispiet dal an prime a nivel regjonâl intal numar dai fruts coinvolts in câs di pedopornografie e seduzion. I pericui a son lis realtâts virtuâls des rêts social, videozûcs e messazistiche, che però tal stes timp a puedin costituî ancje une grande oportunitât di cressite personâl, ma che a domandin la atenzion massime.
Intal 2021 a son stâts ben 72 i câs tratâts dal Compartiment Polizie Postâl e des Comunicazions dal Friûl Vignesie Julie di pedopornografie e seduzions in linie. Al continue, di fat, a cressi il numar di sogjets indagâts par reâts di pedopornografie e seduzion, cun 36 personis denunziadis ae Autoritât Judiziarie e il trend, ancje intal 2022, al è in aument costant.
Di chescj dîs, di fat, la conclusion de Operazion ‘Luna’ condote de Postâl Fvj che al à permetût l’arest di une persone e la denunzie di altris 30 par detenzion, cession e divulgazion di materiâl pedopornografic sul teritori nazionâl.MR
