La Zonte regjonâl e à aprovât, daûr de propueste dal assessôr aes Infrastruturis e Teritori, Graziano Pizzimenti, il bant pe assegnazion dai finanziaments pal acuist di scuelebus de bande dai Comuns cun mancul di 10 mil abitants.
L’avîs al conten lis modalitâts, lis carateristichis e i criteris di valutazion pe formazion de graduatorie e i modui pe presentazion de domande e de rindicontazion.
“Al è il secont bant pai scuelebus dopo chel dal 2019, che in graciis di chel a son stâts finanziâts za plui di 70 piçui Comuns sot dai 5 mil abitants – al à dite Pizzimenti -. Cun chest gnûf avîs, si slargje il numar di beneficiaris viodût che a podaran fâ domande di contribût ancje i Comuns dai 5 ai 10 mil abitants. La Aministrazion regjonâl e larà indevant a contribuî fin al 80% de cifre domandade, ma cu la introduzion di un cuviert massim di spese fin a 150 mil euros. L’avîs, finanziât cuntun milion di euros – al à zontât Pizzimenti – al da une altre rispueste ai Comuns, chei plui grancj, che a àn dut câs la dibisugne di cambiâ un mieç vieri par acompagnâ i students a scuele in sigurece”. (ADG) – 7.10.2022
