E je stade une corse cuintri dal timp chê par salvâ une femine becade îr sot sere di cetancj calavrons a Malghe Fleons, tal comun di For di Avoltri.
Daspò dal assalt dai calavrons la femine e à tacât a vê mâl e lis sôs cundizions a son ladis simpri piês. Il compagn, no rivant a doprâ il telefon satelitâr al è lât di corse a pît bande Malghe Sissanis indulà che al è rivât in 30 minûts e al à cussì rivât a cjatâ segnâl par clamâ i socors.
Un tecnic de stazion di socors alpin di For di Avoltri al è lât su di corse cuntun pick up, intant che la Sores e mandave sul puest l’elisocors regjonâl e i socoridôrs de Vuardie di finance. Par vie de gravitât de situazion, la femine e je stade stabilizade e puartade fintremai Pierabec indulà che e je stade cjamade sul elicotar par jessi puartade in svol tal ospedâl di Udin. La siore e je stade declarade fûr pericul. La scuadre di socors de Vuardie di finance intant e je lade su te Malghe par cjapâ su la fie minôr di etât restade sul puest. (a.d.g.) – 24.07.2026